Instagram узактыгы 90 мүнөткө чейин болгон видеолордун жаңы форматын жана авторлорго роликтерди бир нече бөлүктөн турган ырааттуу окуяларга бириктирүүгө мүмкүндүк берген сериал функциясын сынап жатат. Бул тууралуу Business Insider жазды.

Азырынча жаңы функциялар АКШдагы чектелген сандагы колдонуучуларга жана Бразилиядагы айрым контент жаратуучуларга жеткиликтүү. Сериал функциясы өзүнчө видеолорду бир нече эпизодго бириктирүүгө мүмкүндүк берет. Видеонун үстүндө анын башка бөлүктөрү бар экени көрсөтүлүп, көрүүчүлөр эпизоддордун ортосунда оңой которула алышат. Басылманын маалыматына караганда, Instagram бул ыкма аркылуу колдонуучулардын платформада өткөргөн убактысын көбөйтүүнү жана контент жаратуучуларга аудитория менен тыгыз байланыш түзүүгө жардам берүүнү көздөп жатат.

Узун видеолор жарнамаларды жайгаштыруу үчүн да кошумча мүмкүнчүлүктөрдү түзөт. Бул форматты өнүктүрүүнүн дагы бир себеби — контентти телевизорлордон көрүү. Узундугу 90 мүнөткө чейинки горизонталдуу видеолор чоң экрандарга кыска вертикалдуу роликтерге караганда көбүрөөк ылайыктуу.

Instagram буга чейин телевизорлордо да өзүнүн катышуусун кеңейтип жатат. АКШда Amazon Fire TV платформасында иштей баштаган тиркеме эми Google TV, Samsung телевизорлору жана Apple TV түзмөктөрүндө да жеткиликтүү.