Аскер прокуратурасы мыйзам бузууларды аныктоо жана четтетүү, мамлекеттин кызыкчылыктарын коргоо, ошондой эле жер пайдалануу жана курулуш чөйрөсүндө мыйзамдуулукту камсыз кылуу боюнча иштерди улантууда.

Аскер прокуратурасы тарабынан жүргүзүлгөн көзөмөл иш-чараларынын жүрүшүндө Өзгөчө кырдаалдар министрлиги тарабынан «Байтик» метеостанциясынын аймагында мыйзамсыз имарат курулгандыгы аныкталган. Аталган курулуш иштери Ала-Арча дарыясынын өзгөчө коргоо режими белгиленген суу коргоо зонасында жүргүзүлгөн. Бул факты боюнча Өзгөчө кырдаалдар министрлигинин мурдагы министри Бообек Ажикеев кылмыш жоопкерчилигине тартылып, мамлекетке келтирилген 7 миллион 650 миң сом өлчөмүндөгү зыян толугу менен өндүрүлгөн. Мындан тышкары, Чүй облусунун Аламүдүн райондук сотунун чечиминин негизинде мыйзамсыз курулган имарат Архитектуралык-курулуштук контролдоо мамлекеттик департаментинин жана Өзгөчө кырдаалдар министрлигинин өкүлдөрүнүн катышуусунда буздурулду.