Аскат Алагозов: "Бир дагы чет өлкөлүк жаран курал алып биздин аймакта кандайдыр бир объект кайтарбайт"
"Бир дагы чет өлкөлүк жаран курал алып биздин аймакта кандайдыр бир объект кайтарбайт. Ага мыйзамдар да жол бербейт. Бул жигиттин видеосун башкалар да көрүп алып, ишенип албасын, жаңылып калбасын деген ниетте бөлүшүп жатам. Анткени видеодогу сөздөрүнүн баардыгы жалган". Бул тууралуу президенттин басма сөз катчысы Аскат Алагозов соцтармактагы баракчасына жазды.
"Ошол эле маалда элди дүрбөлөңгө салуу максаты да кашкайып көрүнүп турат. Тилекке каршы, коомубузда маалыматтардын чын-бышыгын тактабай туруп, “чын эле ушундайбы?” деп ээрчип кеткен жарандарыбыз да бар. Мен толук жоопкерчилик менен айтып коеюн, Кыргызстандын аймагында бир да чет мамлекеттин куралдуу күчтөрү же түзүмдөрү жок. Болушу да мүмкүн эмес.
Өлкө аймагындагы кен казуубу же башка биргелешкен чоң-чоң долбоорлор болобу, аларды иштетүүдөгү коопсуздукту өзүбүздүн милиция кызматкерлери же жеке күзөт кызматтары камсыз кылат. Бүгүнкү күндө Кыргыз Республикасы Жамааттык Коопсуздук жөнүндө Келишими Уюмунун мүчөсү катары кабыл алган эл аралык милдеттенмелердин алкагында гана Кант шаарындагы Россиялык бирдиктүү аскердик объект иш алып барууда. Ал эми видеодо сүйлөп жаткан Айдарбек Раев 2024-жылы Американын жарандыгын алыптыр (фото комментарийде). Ал жакта жатып алып жомок токубай, бул жактагы туугандарынан деле сурап койсо болмок экен. Көрүнүп тургандай, Кыргызстандын өнүгүүсүн каалабаган сырткы күчтөр бар. Айдарбектей балдар өздөрү билип-билбей, түшүнүп-түшүнбөй мына ошондой күчтөрдүн куралына айланууда.
Бийлик мызамдуу жоопко тарта баштаса “мени жөн эле жоопко тартып атат” деген сөздөрдү айта башташат. Ошондуктан ушундай жалган маалыматтарды таратып провокация кылуудан алыс болуңуздар. Репост да кылбаңыздар", - деп жазылат билдирүүдө.
